Werth y byd i gyd yn grwn

The Bear - cyfres seren Michelin o Chicago


Waeth i mi fod yn gwbl onest ddim. 'Snam pwynt gwylio S4C ddiwedd Awst. Iawn os 'da chi heb weld ailddarllediad o Adre lle mae Nia Parry yn piciad i gartre enwogion a Gareth Wyn Jones, neu'n dal i ddal fyny ar arlwy'r Babell Lên. A siawns fod PAWB wedi gweld Cynefin a Stori'r Iaith y tro cyntaf erbyn hyn, waeth pa mor dda ydyn nhw.

Diolch i'r drefn am danysgrifiadau'r sianeli Saesneg. Dwi wedi dechrau gwylio sawl peth, cofiwch, a rhoi'r gora iddi wedi pennod gynta symol ar y naw ar netfflics. Gormod o bwdin pum-cyfres-deg-pennod yr un, ydi hi weithiau.

Er, efallai ddylwn i orffen gwylio Rough Cut hefyd, ar ôl colli mynadd hanner ffordd drwy'r darllediad gwreiddiol ar y Sianel Gymraeg am ryw reswm. Well i mi frysio hefyd, gan eu bod nhw newydd ddechrau ffilmio ail gyfres Iwcs (heb Doyle).

Ond mae ambell un sy'n werth yr amser a'r ymdrech, fel...

 

Marnow Murders (Walter Presents) Thriller o ardal y llynnoedd yr Almaen, am ddeuawd o'r enw Lona Mendt a Frank Elling sy'n ceisio dal llofrudd cyfresol ganol haf chwilboeth. Mae'r ffin rhwng y proffesiynol a'r personol yn denau iawn wrth i'r ymchwiliad droi'n reit flêr a go waedlyd, gyda chwmni fferyllol a phen bandits yr heddlu yn gwneud unrhyw beth i gelu'r gwir, ysbrydion y Stasis (heddlu cudd y Deutsche Demokratische Republik) sy'n dal i staenio'r Almaen unedig heddiw, a thorcalon cariad. Fe wnaeth marwolaeth annisgwyl un o'r prif gymeriadau f'ysgwyd i'r carn. Un o gyfresi gorau Walter Presents eleni i mi.


Three Pines (Amazon Prime) Un cwyrci o Quebec ag elfennau mwy difrifol, lle mae ymchwiliad y Prif Arolygydd Armand Gamache (Alfred Molina dibynadwy o dda) i lofruddiaeth hen ast o awdures yn nhref anghysbell 'Three Pines' ar wyl San Steffan yn mynd law yn llaw â sgandal diflaniad merched ifanc brodorol a methiant yr awdurdodau gwyn i ddod o hyd iddyn nhw. Addasiad o gyfres 18 nofel Louise Penny. Meddyliwch am groesfrid Twin Peaks-Doc Martin wedi'i gosod ym mhrydferthwch y Ganada-Ffrengig.


The Bear (Disney+)  Mae Carmen Berzatto, chef o'r radd flaenaf, yn dychwelyd adra i'w ddinas enedigol i geisio gael trefn ar fusnes brechdanau'r teulu ar ôl i'w frawd wneud amdano'i hun - gan adael cegin anhylan, baich biwrocratiaeth, tomen o ddyledion a staff cecrus heb eu talu ers wythnosau. Wrth iddo chwysu chwartia i drïo cael The Original Beef of Chicagoland nôl ar ei draed, buan y daw i glosio a dibynnu ar ei deulu newydd o weithwyr brith. Yng nghanol bedlam y gegin, mae 'na enydau tyner iawn ac ambell bennod arbennig - fel un Instardderchog o Copenhagen, wrth inni ddilyn un o'r cogyddion yn serenu ar gwrs crefftio pwdinau. Gyda phenodau hanner awr yr un, dyma gyfres berffaith i'w mwynhau dow-dow cyn noswylio.

 

World on Fire (dwy gyfres ar BBC iPlayer) Un i'r Brits rhonc ar yr olwg gynta, am filwyr a phobl gyffredin adeg yr Ail Ryfel Byd, ond sy'n siwr o wylltio'r Brexiteers pybyr efo actorion a deialog amlieithog, o Ffrangeg i'r Almaeneg, Pwyleg, Hindi a Mancunian. Mae'r cast yn ardderchog (efo Lesley Manville yn ei helfen fel yr hen snoben o Swydd Gaer sy'n gorfod cydfyw â'i theulu mabwysiedig o Wlad Pwyl), y straeon amrywiol yn gafael (Americanwr croenddu sy'n sownd ym Mharis dan law'r Natsîaid, nyrs ifanc sy'n ymuno â byddin gêl Ffrainc, carfan o filwyr Indiaidd sy'n dioddef hiliaeth slei y British Army yng ngogledd Affrica, i fraw aelodau ifanc Cynghrair Merched yr Almaen sy'n ddim mwy na pheiriant babis i'r Gestapo) a'r CGI yn amrywiol. Blocbystyr byd-eang go iawn, fel arferai'r hen BBC eu gwneud.



Comments

Post a Comment

Popular posts from this blog

Prisoner Cell Block "Ll"

Image
  Gwion Tegid   Fis yn ôl roeddwn i’n diawlio cynyrchiadau cefn-wrth-gefn ac yn gofyn i S4C a/neu BBC Wales “arbed amser ac arian trwy ffilmio un rhifyn bei-ling fel Bang gydag isdeitlau ar y sgrin, i’w darlledu’n rhyngwladol dan faner Cymru Noir”. Sôn am sbŵci, achos cafwyd datganiad i’r wasg gan y Sianel ddechrau Ionawr yn ategu’r union beth, wrth gyhoeddi drama newydd “ Bariau yn dilyn llwyddiant drama drosedd ddwyieithog fawr gyntaf S4C, Bang” sydd wedi’i gwerthu i Ganada, Gogledd America a Sweden ers hynny. Ro’n i wedi cymryd at y ddrama hon ar sail ei theitl yn unig, lle rydyn ni’n dal i fyny efo Barry Harry ( Gwion Tegid ), dihiryn hoffus Rownd a Rownd ers talwm, yng ngharchar y Glannau. Ond roedd neges ar wefan Clic (“Mae'r rhaglen hon yn cynnwys golygfeydd o natur rywiol, golygfeydd treisgar ac iaith gref”) yn awgrymu’n gryf nad ydi hon mor addas i’r teulu cyfan ag y mae’r sioe sebon o Lanrafon. Ac o’r cychwyn cyntaf bron, mae’r cymeriadau caled yn effio a blei...
Read more

Plismyn drama a go iawn

Image
Elen Rhys a  Nid DI Mathias   Roeddwn i wedi cyffroi’n lân am bwl cyn Dolig. Ar ôl sôn am Y Gwyll yng ngholofn mis Rhagfyr, dyma ddatganiad i’r wasg yn cyhoeddi bod Richard Harrington wrthi’n ffilmio cyfres dditectif newydd o'r enw Cleddau . Sbin-off! meddyliais, gyda’r hen DI Mathias fythol bruddglwyfus wedi codi pac a symud i’r de o Aber. Troseddau newydd, seidcic newydd, a chyfle i ddangos rhywfaint o ysblander Sir Benfro i weddill y byd. Ond dwi’n amau i mi adio dau a dau a chael 999 achos sdim sôn o gwbl am ’rhen Fathias yn yr amrywiol ddatganiadau, dim ond bod cyn-gariadon (Harrington ac Elen Rhys) yn ymchwilio i “lofruddiaeth ysgytwol nyrs sy’n agor hen glwyfau mewn cymuned tref fach, gan daflu euogfarn hanesyddol i amheuaeth a chodi'r posibilrwydd arswydus o lofrudd copycat ”.  Mi fuasai'r sinig yn deud mai copycat o bob drama drosedd dywyll dan haul fydd hon hefyd. Cwpl anghymarus mewn cotiau glaw? Tic. Sawl golygfa mewn coedwig tamp? Tic. Gwerthu'r fersiw...
Read more

Drama hirfelyn tesog

Image
Y Morganiaid Ydi comisiynwyr drama S4C wedi colli nabod ar eu cynulleidfaoedd bellach? Y gynulleidfa graidd, hynny yw, sydd wedi bod yn uffernol o ffyddlon i’r Sianel ers y dyddiau cynnar – nid hacs papurau newydd Lloegr yn y gobaith o gael sylw yn sbred uchafbwyntiau teledu’r wythnos. Cynulleidfaoedd fel fy mam, fy modrybedd ac ewythrod a’r miloedd mwy a arferai edrych ymlaen at ddrama nos Sul ar hyd y blynyddoedd. Ond ddim mwyach. Fe gawson nhw eu difetha’n rhacs yn y nawdegau, gyda dramâu cyfnod fel Y Palmant Aur hyd at Con Passionate Siwan Jones yn y mileniwm newydd wedyn a misdimanars gwleidyddol y Bae yn Byw Celwydd . Doedd ganddyn nhw ddim i’w ddweud wrth y cyfresi ditectifs fu’n boblogaidd am bwl, yn wahanol i fi, oedd wedi mopio ar Y Gwyll yn nhraddodiad gorau’r Sgandinafiaid. Ond colli mynadd wnes innau’n raddol wedyn, wrth i fwy o ddramâu cefn wrth gefn gael eu cynhyrchu gan roi’r argraff anniddig taw fersiwn Saesneg BBC Wales oedd yn ben, yn enwedig ag ambell actor ddi...
Read more